അടക്കം / കെ ആർ ടോണി

പ്ളമേനമ്മായിയുടെ വീട്ടിൽ

പൊട്ടനു എന്നും പണിയുണ്ട്

ജോർജ്ജേട്ടന്റെ കയ്യാളായി

എന്തിനും കൂടെയുണ്ടാകും പൊട്ടൻ

ആരെങ്കിലും മരിച്ചാൽ പള്ളിയിൽ നിന്ന്

പൊട്ടനെ തേടി ആൾ വരും

ജോർജ്ജേട്ടനോട് ആഗ്യം കാട്ടി സമ്മതം വാങ്ങി

സെമിത്തേരിയിൽ ശവക്കുഴി വെട്ടാൻ

പൊട്ടൻ പോകും

പിക്കാസും തൂമ്പയും ജോർജ്ജേട്ടൻ കൊടുക്കും,

പിന്നെ രണ്ട് ചൂടിക്കയറും കൊലരും മാത്രം മതി;

അത് പൊട്ടനു സ്വന്തമായുണ്ട്.

ചൂടിക്കയറുകൊണ്ട് വേണം മഞ്ച കുഴിയിലിറക്കാൻ;

കല്ലറയിലാണു അടക്കുന്നതെങ്കിൽ

വാർപ്പ് പലകകൾക്കിടയിലുള്ള പഴുതുകൾ

സിമന്റിട്ട് അടയ്ക്കാനാണു കൊലരു !

കുഴിവെട്ടുകാരനു പത്ത് രൂപയാണു കൂലി.

അത് കിട്ടുന്ന ദിവസം മാത്രം

പൊട്ടൻ കള്ള് കുടിക്കും,

അന്ന് വേറെ പണിക്ക് പോകില്ല

ജോർജ്ജേട്ടന്റെ കല്യാണദിവസം

പൊട്ടൻ ഏറെ ആംഗ്യങ്ങൾ കാട്ടി;

ജോർജ്ജേട്ടൻ  ക്യഷിപ്പണി നിർത്തിയപ്പോൾ

പൊട്ടൻ ദിവസം മുഴുവൻ ആംഗ്യങ്ങൾ കാട്ടി;

എഫ് സി ഐയിൽ ജോലിക്ക് പോകാൻ

ആദ്യമായി പാന്റ്സിട്ട ജോർജ്ജേട്ടനെ നോക്കി

പൊട്ടൻ കാണിച്ച ആംഗ്യങ്ങൾ

എനിക്ക് പോലും മൻസ്സിലായി !

ജോർജ്ജേട്ടൻ മരിച്ചപ്പോൾ പൊട്ടൻ,

വീട്ടിൽ കിടത്തിയ ശവത്തെ നോക്കി

ആംഗ്യം കാട്ടിയ ശേഷം,

പിക്കാസും തൂമ്പയുമെടുത്ത് കുഴിവെട്ടാൻ പോയി;

കുഴിക്കല്ലറയിലായിരുന്നു അടക്കം.

എല്ലാവരും അന്ത്യചുംബനം അർപ്പിച്ച ശേഷം,

സെമിത്തേരിയിൽ കിടത്തിയ ശവത്തെ നോക്കിയും

പൊട്ടൻ ചില ആംഗ്യങ്ങൾ കാട്ടി;

പിന്നെ മഞ്ച മൂടി, കുഴിയിലിറക്കി, മണൽ നിറച്ചു,

സിമന്റിട്ടു പഴുതടച്ചു.

തന്റെ കുറെ ആംഗ്യങ്ങളും എന്നെന്നേക്കുമായി

ആ കല്ലറയിൽ അടക്കപ്പെട്ടതായി പൊട്ടനു തോന്നി;

അന്ന് അയാൾ കുടിച്ചില്ല

കീരി രോമം - എൻ.പ്രഭാകരൻ

പതിന്നാലു വയസ്സുള്ള പെൺകുട്ടിയെ
പതിനാലുപേർ ചേർന്ന്
ബലാത്സംഗം ചെയ്ത് കൊന്നു
പത്തൊമ്പതുകാരൻ പത്തൊമ്പത്
കോടി രൂപയുടെ വെട്ടിപ്പ് നടത്തി
തെരുവിൽ മൂന്ന് മിനുട്ടിനുള്ളിൽ
മൂന്ന് തവണ ബോംബ് പൊട്ടി
എല്ലാം മുറ പോലെ നടക്കുന്നു

അമ്മയുടെ മ്യതദേഹം ഏറ്റുവാങ്ങാൻ പണമില്ലാതെ
ആശുപത്രി വരാന്തയിൽ ഒരു മകൻ ഏങ്ങലടിച്ച് കരയുന്നു
റോഡിൽ ബൈക്കിടിച്ച് വീണ ഒരാൾ
ആരും ശ്രദ്ധിക്കാനില്ലാതെ മണിക്കൂറുകൾ കിടന്ന്
ചോരവാർന്ന് മരിക്കുന്നു
നഗരത്തിൽ ശരീരം വിൽക്കാനെത്തിയ
നാട്ടിൻപുറത്തെ വ്യദ്ധയെ
അസംത്യപ്തനായ ഒരു കാമാസക്തൻ
കഴുത്ത് ഞെരിച്ച് കൊല്ലുന്നു
എല്ലാം പിന്നെയും പിന്നെയും സംഭവിക്കുന്നു.

കള്ളനോട്ടടിക്കുന്ന യന്ത്രം വാങ്ങാൻ
വിദേശത്തേക്ക് തിരിച്ച നേതാവിനെ
യാത്രയയക്കാൻ
വിമാനത്തവാളത്തിൽ
വമ്പിച്ച തിരക്കായിരുന്നു
തിരക്കിനിടയിലും നൂണുകയറി
അങ്ങോരുടെ കൈപിടിച്ച് കുലുക്കി.

മടക്കയാത്രയിൽ കുഞ്ഞേട്ടനെ ഓർമ്മ വന്നു
കഴിഞ്ഞ രാത്രിയിൽ ആത്മഹത്യ ചെയ്ത
പഴയ വിപ്ലവകാരി
മടുപ്പല്ലാതെ മറ്റൊരു കാരണവുമില്ലത്രെ
ആ കടുംകൈക്ക്
പുതുതലമുറയ്ക്ക്
മോശപ്പെട്ട മാത്യക കാണിച്ചതിൽ
പൊതുവായ ജനരോഷമുണ്ട്
മരണവിവരം തിരക്കിയെത്തുന്നവരെ സ്വീകരിക്കാൻ
ആളെ കൂലിക്ക് നിർത്തി
ഭാര്യയും മക്കളും
സന്നദ്ധസംഘടനാപ്രവർത്തനത്തിനു
പുറത്തേക്ക് പോയിരുന്നു
നേരം കളയാനില്ലാത്തത്കൊണ്ട്
രണ്ടിറ്റ് മാത്രം കണ്ണീർ വാർക്കുകയും
എന്റെ പേരുവിവരം കൂലിക്കാരനെ
എഴുതിയേൽപ്പിക്കുകയും ചെയ്ത്
ഉടനടി ഞാൻ ഇറങ്ങി

ഇപ്പോൾ വീട്ടുവളപ്പിൽ
ഒരു കീരിയുടെ രോമം തേടി നടക്കുകയാണു
ഈയൊരു പ്രവർത്തിയെ ഞാൻ ഇഷ്ടപ്പെടുന്നു

ഒന്നാമതായി ഇതിനു
ഉദ്ദ്യേശങ്ങളേതുമില്ല
രണ്ടാമതായി
അത് കൊണ്ട് തന്നെ
ഇതൊരു സൗന്ദര്യാത്മക കർമ്മമാണു
മൂന്നാമതായി
നാലാമതായി
കീരിരോമം കിട്ടിയില്ലെങ്കിൽത്തന്നെ എനിക്കൊരു
ചുക്കുമില്ല

റഫീക്ക് അഹമ്മദിന്റെ കവിത കുറി

റഫീക്ക് അഹമ്മദിന്റെ കവിത

കുറി

കറ കളയുവാൻ മരുന്നു വിൽക്കുന്ന
തെരുവിലെ ചേട്ടാ,
ഉടുപ്പിലേക്കെക്സറേ-
തുറുകണ്ണാൽ കുത്തിത്തുളയ്ക്കും ടീച്ചറേ,
തിരക്കടിച്ചിട്ടും വഴക്കടച്ചിട്ടും
ഇടയ്ക്കിടെ പ്രാകിക്കിതയ്ക്കുമെന്നമ്മേ,
കറയല്ല, പ്രിയം നിറഞ്ഞ് വാഴക്കൈ
പുണർന്നു തന്നൊരു
രഹസ്യമാണിത്…

മുറ്റത്തെ തുളസി

ഇടപ്പള്ളി രാഘവൻപിള്ള


മന്ദിരാങ്കണം തന്നിൽ മഞ്ജുകൽത്തറയ്ക്കുള്ളിൽ
മന്ദമാരുതാശ്ലേഷമേറ്റ്കൊണ്ടോടീടുന്ന

മംഗളേ, വ്യന്ദേ, ദേവീ, മംഗളം; ഭവതിയെൻ
മങ്ങിടും മനസ്സിനു മാറ്റേറ്റമേറ്റീടുന്നു

ഉണ്ടു ഞങ്ങളിൽച്ചിലഭാരതീയാദർശത്തിൻ
തുണ്ടുകളിനി,യെന്നാലൊന്നതു നീ താനല്ലേ ?

കുന്ദാദിലതകളും നന്ദനോദ്യാനത്തിലെ
മന്ദാരദാരുക്കളും മന്ദരാം തവ മുമ്പിൽ;

എത്രയോ ജന്മം പാഴിൽ പോക്കി നീ, നീയായിട്ടി-
ങ്ങെത്തുവാനെന്ന കാര്യമോർക്കുന്നീലവർ തെല്ലും!

പ്രാണവായുവിങ്ങേറ്റം നിന്നിലപ്പാശ്ചാത്യർക്കു
കാണുവാൻ കഴിവാർന്ന കാലത്തിൻ മുമ്പ് തന്നെ

കീർത്തനം ചെയ്തു പോന്നു താവകമാഹാത്മ്യത്തെ-
ക്കീർത്തനീയന്മാരെന്റെ പൂർവ്വികർ പുണ്യാത്മാക്കൾ

മാനസം കുളിർപ്പിക്കും സൂനമോ സുഗന്ധമോ
തേനൊലിപ്പഴങ്ങളോ നിന്നിലി,ല്ലെന്താണതിൽ ?

താവകദലങ്ങളും കൂടവേ വരിഷ്ഠമാം
പൂവുകളായിട്ടല്ലേ ചൊൽവതെ,ന്തതിശ്രേഷ്ഠം ?

പിച്ചകവല്ലി നിത്യം നിന്നെയങ്ങിടയ്ക്കിടെ-
പ്പുച്ഛമായ് നോക്കിക്കൊണ്ടു പുഞ്ചിരിതൂകുന്നുണ്ടാം

അംഗസൗഭാഗ്യം , പക്ഷേ, തെല്ലു തേ കുറഞ്ഞാലു-
മെങ്ങിനെവയ്ക്കുണ്ടാം ദേവി തൻ മനശ്ശുദ്ധി !

നിൻ ഗളം കാഴ്ച്ചവച്ചിട്ടീശ്വരസമ്പ്രീതിയെ
ഞങ്ങളീ നിക്യഷ്ടന്മാർ നാൾക്ക് നാൾ തേടീടുന്നു;

തെല്ലുമില്ലിതിൽത്തെറ്റീബ്ഭാരതാരാമത്തിലെ-
പ്പുല്ലുകൾപോലും പോക്കീ ജീവിതം പരാർഥമായ്;

സ്വാർത്ഥതപ്പിശാചിതൻ ത്യഷ്ണയെക്കെടുത്തുവാൻ
ചോർത്തിടും നരാധമർ സോദരഹ്യദ്രക്തവും !

നന്നിതു; തവ നാമ്പുനുള്ളിയങ്ങെടുത്താലു-
മൊന്നിനു രണ്ടായിട്ടു നാളേ നീയേന്തീടുന്നു;

തങ്കരങ്ങളാൽ നിന്നിൽ തങ്കനീരാളം ചാർത്തും
പങ്കജരമണൻ പോയ് സിന്ധുവിൽപ്പതിക്കുമ്പോൾ

കായസംശംദ്ധിചെയ്തു നിർമ്മല വസ്ത്രം ചാർത്തി
കാർകുഴൽ ചീകിക്കെട്ടിക്കാഞ്ചനസുമം ചൂടി

ലോലമോഹനമായ ഫാലദേശത്തിൻ മധ്യേ
ചാലവേ വിഭൂതിയാൽ നേരിയ കുറിയിട്ടു

പിഞ്ചിളം പ്രായം തന്നിൽ മുത്തശ്ശി ചൊല്ലിക്കേട്ട
നെഞ്ചകം കുളിർത്തിടും കീർത്തനം പാടിപ്പാടി

എത്തിടും നിന്നന്തികേ കൈത്തലംതന്നിൽ കത്തും
കൈത്തിരിയേന്തിക്കൊണ്ടെന്നുത്തമവധൂടിയാൾ

മങ്കയാളതു നിൻ പാദപങ്കജേവച്ചു
കങ്കണാരവം ചിന്നും തൻ കരം രണ്ടും കൂപ്പും

അന്യനു ലഭിക്കയില്ലീദ്യശം ഭാഗ്യം; പാർത്താൽ
ധന്യ നീ, നിന്നോടെനിക്കുണ്ടു, തെല്ലഭ്യസൂയ !

പൂന്താനത്തിന്റെ ജ്ഞാനപ്പാനയിൽ നിന്ന്

എത്ര ജന്മം പ്രയാസപ്പെട്ടിക്കാലം
അത്ര വന്നു പിറന്നു സുക്യതത്താൽ

എത്ര ജന്മം മലത്തിൽ കഴിഞ്ഞതും
എത്ര ജന്മം ജലത്തിൽ കഴിഞ്ഞതും
എത്ര ജ്ന്മങ്ങൾ മന്നിൽ കഴിഞ്ഞതും
എത്ര ജന്മം മരങ്ങളായ് നിന്നതും
എത്ര ജന്മം അരിച്ച് നടന്നതും
എത്ര ജന്മം മ്യഗങ്ങൾ പശുക്കളായ്

അത് വന്നിട്ടിവണ്ണം ലഭിച്ചൊരു
മർത്ത്യജന്മത്തിൻ മുമ്പേ കഴിച്ചു നാം !

മ്യദുലം

സാബു ഷണ്മുഖം

നിന്റെ നേര്ത്ത നീണ്ട വിരലുകളില്
എന്റെ ഹ്യദയസ്പന്ദനമുണ്ട്
നിന്റെ രക്തവര്ണ്ണമാര്ന്ന ചുണ്ടുകളില്
ഞാന്‍ നട്ട് വളര്ത്തിയ ഉമ്മയുടെ മരമുണ്ട്

നിന്റെ തുടുപ്പോലുന്ന കവിളില്
ഞാന്‍ നുള്ളിവെച്ച നിലാവിന്റെ നുണക്കുഴിയുണ്ട്
നിന്റെ നെറ്റിയില്‍ ഞാന്‍ തൊട്ട് തന്ന
എന്റെ രക്തത്തിന്റെ ചാന്ത്പൊട്ടുണ്ട്

നിന്റെ മുടിയുടെ നിബിഡവനത്തില്
എനിക്കായി ഒരു വനവാസമുണ്ട്
നിന്റെ പുരികങ്ങളില്
എനിക്ക് കുലയ്ക്കാന്‍ ഓരോവില്ലുണ്ട്

നിന്റെ കണ്ണുകളില്
എനിക്ക് ദാഹം തീര്ക്കാന്
ഓരോ തുള്ളി വിഷമുണ്ട്

ഒരുപ്പൂ

കെ.ജി.ശങ്കരപ്പിള്ള

പൊന്നണിഞ്ഞു നീ തുടുത്ത നാൾ
കൊയ്തെടുത്ത് കെട്ടിയതല്ലേ
നിന്നെ അവൻ ?
മെതിച്ചതല്ലേ
കൊഴിച്ചതല്ലേ
ചെമ്പ് കുട്ടകത്തിൽ പുഴുങ്ങിയതല്ലേ
പൊരിവെയിലിലുറക്കിയതല്ലേ
കുത്തിക്കുത്തി ഉള്ളെടുത്തതല്ലേ
കൊന്നോർക്കും വെന്നോർക്കുമെല്ലാം
അന്നമാക്കി വിളമ്പിയതുമല്ലേ
നിന്നെ അവൻ

എന്നിട്ടുമെന്തിനാ സീതേ
അവൻ വീണ്ടും വരുമ്പോൾ
പ്രിയം നടിക്കുമ്പോൾ
നിലമൊരുക്കുമ്പോൾ
സമ്മതം തൊട്ടു നോക്കുമ്പോൾ
തൊഴിച്ചകറ്റാതെ നീയവനെ
ചിരിച്ചേൽക്കുന്നെ ?

ചിരിയല്ലാതൊരു ക്യഷിയെന്തെൻ ചേച്ചീ
എനിക്കെൻ
കണ്ണീർപ്പാടത്തിനി
വൈകീയറിയാൻ
വല്ലോരുടെയായെൻ വയലെന്ന്

തെരുവ് വിളക്കിൻ കാലുകൾ പോലെ
നെല്ലിൻ ത്ണ്ടുകൾ കിളരും
കതിരുകൾ വിളയും
വയലേലകളിപ്പോഴുമുണ്ടെൻ കനവിൽ
പാലക്കാട്ടും പായിപ്പാട്ടും ത്യശ്ശൂരും...
ഭാഗ്യം
കനവിൽ ഇരുപ്പൂ മുപ്പൂ
വിളവുണ്ടിന്നും